ភ្នំពេញ៖ ចម្ការនិងរោងចក្រវេចខ្ចប់ផ្លែមៀនកម្ពុជាត្រូវបានអនុញ្ញាតឱ្យនាំចេញទៅកាន់ប្រទេសចិន ដោយក្នុងនោះចម្ការផ្លែឈើចំនួន៧៤ និងរោងចក្រវេចខ្ចប់ដំណាំនេះចំនួន៨កន្លែងត្រូវបានចុះក្នុងបញ្ជីរបស់រដ្ឋបាលគយរបស់ប្រទេសចិន។
យោងតាមបញ្ជីរាយឈ្មោះចម្ការនិងរោងចក្រវេចខ្ចប់ផ្លែឈើក្នុងការនាំចេញទៅកាន់ប្រទេសចិនដែលចេញផ្សាយដោយរដ្ឋបាលគយប្រទេសចិន កាលពីថ្ងៃទី០៧ ខែកញ្ញា ឆ្នាំ២០២២នេះ ឱ្យដឹងថា ក្នុងបញ្ជីរាយឈ្មោះបន្ថែម ឈ្មោះចម្ការនិងរោងចក្រវេចខ្ចប់ផ្លែមៀនកម្ពុជាត្រូវបានអនុញ្ញាតឱ្យនាំចេញទៅកាន់ប្រទេសចិន។
ក្នុងនោះ ចម្ការដំណាំមៀន ដែលបានចុះបញ្ជីចំនួន ៧៤កន្លែង និងរោងចក្រវេចខ្ចប់ចំនួន៨ កន្លែងត្រូវបានអនុញ្ញាតដោយភាគីចិន ដើម្បីធ្វើការនាំចេញ។ មួយវិញទៀតចម្ការដំណាំស្វាយចំនួន ៧៤កន្លែង និងរោងចក្រវេចខ្ចប់ដំណាំស្វាយចំនួន២កន្លែងផ្សេងទៀតក៏ត្រូវបានបន្ថែមផងដែរ។
គួរឱ្យដឹងថា ចាប់តាំងពីដើមឆ្នាំ២០២២នេះ ភាគីចិនបានបង្កើតទម្រង់ការងារថ្មី និងបានបញ្ចប់ការវាយតម្លៃហានិភ័យលើ ត្រីប្រា ដំណាំពោត និងដំណាំមៀននៅកម្ពុជាយ៉ាងមានប្រសិទ្ធភាព។
ជាមួយគ្នានេះ បើគិតមកទល់បច្ចុប្បន្ន កម្ពុជាបានធ្វើការនាំចេញផ្លែឈើធំៗចំនួន៣ប្រភេទទៅកាន់ប្រទេសចិនដូចជា ដំណាំចេក ស្វាយ និងមៀន៕